土木師兄弟

2007年7月21日星期六

阿輝回港洗塵夜 -- 石硤尾超值豪華大餐 & 太子沙灘女郎酒吧

除左上次o係盧溝橋紀念日, 同阿華, 阿jan, stephen四條友仔去左 Neway唱K同打Winning之外, 我地呢班Civil同學仔都好耐冇Gathering喇.

今次, 好難得阿輝一返到黎香港, 就約我地出黎食飯見面, 有好多人出現呀, 有阿輝, 阿victory, 阿華, 阿jan, stephen, paul少, 同埋阿roy. 可惜, 原本第一個報名要黎o既奶坤, 因為逃唔出公司o既魔掌, 突然間黎唔到... 而阿蛇仔又唔知點解, 無覆過email喎, 真係令人感到有一dd美中不足o既感覺呀.

琴日, 當我去到石硤尾o既時間, 發生左一樣好動魄驚心o既事. 當去o既地鐵站出黎果陣, 唔知道點樣去食野果度, 而條街又好鬼死靜, 一個人都無(除左我之外), 我就好徬徨咁打電話俾victor啦. 突然間, 無啦啦有架形跡可疑o既私家車停o係我側邊, 車裏面仲有個標形大漢搞底個窗, 無啦啦咁同我講野, 真係嚇鬼死我呀, 我仲以為係大陸果d搶電話黨黎左香港搵食添... 原來係Stephen同埋阿Jan...

好喇, 講返正提先. 琴日去左石硤尾果度食飯, 果間陣叫做品香樓. 果度真係好鬼死多人幫襯呀. 好彩阿victor book左位o者. o係果度食野, 有大排檔o既風味, 又有空調, 而且仲係比茶餐廳貴小小o既收費, 平均每人70蚊都唔使. 真係唔錯.

食飯果陣時, 阿華無啦啦攞左份禮物出黎, 起初我仲以為佢地買野送俾阿輝 (當晚o既主角嘛), 都唔預埋我添... 原來, 份禮物係賀我同我太太結婚o既... 我好耐都冇收過禮物喇, 真係有d不知所措, 果陣時真係唔知道講d乜野好... 真係多謝晒大家~~~

傳聞話, 琴晚我地原本留左好多野食俾遲到o既阿roy架. 不過, 阿roy實在係遲得太犀利囉, 我地等到差唔多十點, 佢都仲未到, 而果度又真係實在太多人, 太嘈, 所以, 我地就去左太子果度飲野喇. 向來都謹守「酒戒」o既paul少, 亦都o係果陣時同我地分手喇.

去到酒吧果陣時, 阿roy就已經o係太子果頭等我地喇. 我地就入左去中間有大大張橫額話大沙灘女郎註場o既酒吧喇. 果度真係有d啤酒妹著比堅尼個喎. 阿paul少無黎就真係size晒喇. 其實, 入酒吧, 除左飲酒之外, 都可以飲可樂呀, 橙汁呀, 有d酒吧仲有牛奶供應o既添.

果晚黎左兩個啤酒妹黎幫我地飲酒, 我地就派五個人(包括我)出黎會下佢地啦. 合埋七個人玩大話骰, 我發現, 平均十鋪六鋪係開唔夠十粒骰o既, 咁我就好大膽咁樣, 當d啤酒妹叫到13, 14粒果陣, 就開佢地啦, 又真係幾靈喎. 但係, 我覺得自己真係坐錯位囉, 一張正方形o既台, 我坐左o係最陰盛陽衰果邊, 而阿roy又成日叫12個6, 搞到我唔知點叫好, 就俾下面個啤酒妹係咁開我... 我又醉醉地, 俾人開完之後唔忿氣, 係咁叫7個1, 成晚我就飲大4, 5杯酒, 就俾人話厄酒飲喇... 真係無陰公...

可能因為之前兩三晚唔夠訓, 而自己又太耐無飲過酒, 琴晚我真係醉左. 好彩阿roy今日要返澳門開工, 叫佢送我返屋企, 如果唔係, 我可能又唔見銀包架喇. (victor結婚果晚, 我落的士果陣即刻嘔, 嘔到放低左個Gucci銀包o係地下度唔記得拎返, 好彩d好心人淨係攞走左d錢同埋張八達通, 之後唔知係咪同一個人將我成個銀包同埋裏面d身份証同埋信用卡拎左去差館...)

阿roy, 真係唔好意思喇, 其實, 我都知道你唔捨得個馬兒架喇, 不過, 我真係好驚再唔見野... 要你咁早走, 真係唔好意思...